Bizkaiko Foru Aldundia Plentziako, Gorlizko eta Sopelako Arriatera-Atxabiribil hondartzetan jostailuak eta jostailu-hondakinak biltzeko proba pilotu bat abiatu du, etorkizunean lurraldeko hareatza guztietan zerbitzu hori ezarriko ote duten zehazteko.
Proba egiteko, hondartza horiek aukeratzeko orduan, erabiltzaile-tipologia bi ezberdin erabili dituzte oinarri gisa eta, horri esker, zehatzago ebaluatu ahal izango dute horrelako zerbitzu bat izateko premia eta egokitasuna dagoen. Zehaztu dutenez, Plentziako eta Gorlizko hareatzak dira umeak dituzten familia gehiagok erabiltzen dituztenak, eta Arriatera-Atxabiribilek, berriz, publiko gazte gehiago erakartzen du, eta haur gutxiago.
Proba pilotu horretan, erabiltzaileek ahaztutako edo hondarretan galdutako jostailuak jasoko dituzte, bai eta baheketa-makinek bildutako jostailu horien hondakinak ere. Ondoren, edukiontzi berezi batean biltegiratuko dituzte aldian-aldian, bilketa horien konposizioaren karakterizazioa egingo dute, eta bilketa bakoitzaren inguruko txosten bat egingo dute. Txosten horiek balio izango dute proiektuaren interesa zehazteko eta proiektua etorkizunean beste hareatza batzuetara zabalduko duten zehazteko, txosten horietan bildutako datu errealak oinarritzat hartuta.
Ekimen hori aurtengo hondartza-denboraldi osoan zehar garatuko dute, eta horrela bete egingo dute Bizkaiko Batzar Nagusiek joan den apirilaren 16an emandako agindua.