Uribe Kostako Ikasle Abertzaleak-ek erakunde horrek Bilbo Handian antolatutako Udako Kanpaldian parte hartuko du datorren martitzenean eta eguaztenean. Azaldu dutenez, eskualdetik Ezkerralderako ibilbidea egingo dute, Armintzatik hasita, eta, bidean, "lanketa politikorako, aisialdirako eta sozializatzeko" tartea izango dute.
Armintzatik Portugaletera, Udako Kanpaldia egitasmoa antolatu du Ikasle Abertzaleak erakundeak uztailaren 16 eta 17rako. Martitzenean, 11:00etan, Armintzako portutik irtengo dira, eta eskualde osoa zeharkatuta, hurrengo egunean helduko dira Ezkerraldera, 17:00ak aldera.
Ibilaldian hainbat geldialdi egingo dituzte, hala nola Gorlizen eta Larrabasterran, eta hainbat jarduera egingo dituzte. "Gai ezberdinak jorratuko dituzten tailer eta hitzaldiak egongo dira, grafiti tailerra edo industria kulturalaren funtzioak, besteak beste; horretaz aparte, jolas ezberdinak egongo dira". Egitarauari Portugaleteko Sastraka gaztetxean emango diote amaiera, serigrafia tailer bategaz eta kontzertuakaz.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
