Palestinan gertatzen ari den sarraskiak astinduta, ia urtebete igaro da Gernika-Palestina izeneko herri-ekimena martxan jarri zela Euskal Herrian. Hastapenetik, ekimen horren helburua da herrietan "ahalik eta erantzun zabaletan eta transbertsalena artikulatzea"; horretarako, garrantzia berezia eman gura diote jendarte zibilaren mobilizazioari, "honen bidez gure elkartasuna bideratuz eta instituzioak zein nazioarteko komunitatea interpelatuz".
Hori horrela, beste behin, berehalako su-etena eta genozidioaren amaiera ozen aldarrikatzeko kalera irtengo dira, "munduan Gernika gehiago egon ez daitezen Bakea eta Justiziaren aldeko deia" egiteko. Hala, deialdia urriaren 21ean egingo dute, astelehenean, Donostian izandako lehen mobilizazio handiaren urteurrenagaz bat eginez.
Deialdiak Uribe Kostan
Eskualdean, hainbat deialdi konfirmatu dituzte daborduko, hala nola Erandion, Itzubaltzeta/Romon, Algortan, Berangon, Plentzia-Gorlizen, Sopelan, Urdulizen, Lemoizen eta Leioan. Mobilizazioak 19:00etan abiatuko dira, herriz herriko udaletxeetan; Romon eta Algortan, Santa Eugenia eta Telletxe plazetan, hurrenez hurren.