Alerta laranja ezarriko dute gaur eguerdian, euriteengatik

Iker Rincon Moreno 2024ko abe. 8a, 11:43
Deskargatu Info Ahotsak :
es en fr

Eusko Jaurlaritzako Larrialdiei Aurre egiteko eta Meteorologiako Zuzendaritzak alerta laranja ezarri du gaurko, domekarako, prezipitazio iraunkorrengatik, 12:00etatik biharko 12:00etara. Euskalmetek iragarri duenez, 24 orduan 80 l/m² baino gehiago pila daitezke Kantauri isurialdean. Era berean alerta laranja indarrean dago, gauerdira arte, itsasaldeko arriskuagatik; sei metrorainoko olatuak espero dira.

Besteak beste, Getxoko Udalak Krisi Mahaia deitu du, eta prebentzio-neurriak hartuko dituela iragarri du. Urdulizen, bestalde, gaurko iragarrita zegoen mahai-jolasen ekimena bertan behera uztea erabaki du Udalak, eguraldiaren iragarpenagatik. Leioan ere gaurko iragarritako azoka bertan behera utzi dute.

Bart egindako haizeteek, gainera, hainbat eragin utzi ditu eskualdean, eta suhiltzaileek hainbat esku-hartze egin behar izan dituzte eroritako zuhaitzak mozteko eta etxebizitzak saneatzeko, hala nola Getxo eta Sopelan.

Bart Algortako Villamonte auzunean eroritako zuhaitz bat moztu behar izan dute suhiltzaileek gaur.

Gomendioak

  • Ez ateratzea mendira edo ur-kirolak egitera.
  • Jaistea muino, mendixka eta bizkarretatik.
  • Ez jartzea aterpe bila zuhaitz bakartien pean.
  • Ez sartzea babes bila nahiko sendoak ez diren eraikinetara.
  • Ibilgailua aterpe ona izan daiteke. Abiadura mantsotu, adi egon, eta ez geratzea ur asko pasa daitekeen lekuetan.
  • Kalean, eraikinen estalpean jartzea ona izan daiteke deskargetatik babesteko.
  • Kontu izatea adar, kartel edo hormagaz.
  • Etxe barruan, saihestu aire-korronteak, tximistak erakartzen dituzte-eta. Horregatik gomendatzen da ateak eta leihoak ixtea, ekaitza badago.
  • Linterna, kandela eta halako argi autonomoak eskura edukitzea elektrizitatea eteten bada.
  • Deskarga elektriko handia badago, deskonektatu etxe-tresna elektrikoak eta telebistaren antena, tentsio-gorakadak ez kaltetzea edota deskarga elektrikorik eragitea saihesteko.
  • Kendu ibilgailuak ur-putzuak sor daitezkeen inguruetatik eta urpetu daitezkeen garajeetatik.
  • Ahal baduzu, ez hartu autoa. Bidaiatu beharra baduzu, ahal duzula, ibili errepide nagusi eta autobideetatik, eta ikusi ezinik bazabiltza, gelditu leku segururen batean.
  • Erretiratu urak eramateko moduko gauza guztiak, batez ere, kutsadura eragin dezaketen produktu arriskutsuak. 

Larrialdiren bat izatekotan honako telefono zenbaki hauetara deitu behar da: 112  (SOS DEIAK).

Jendartea Barrika Berango EHU Erandio Getxo Gorliz Leioa Lemoiz Plentzia Sopela Urduliz
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun