Urte berriko ospakizunek hainbat gertakari utzi dituzte eskualdean: batetik, Gabon zahar gauean, osasun-zerbitzuek Ertzaintzako agente bi artatu behar izan zituzten Getxoko Beato Domingo Iturrate kaleko etxebizitza bateko sutean kea arnasteagatik, eta, bestetik, goizaldean, beste sute bat izan zen Plentzian, etxe bateko teilatuan.
Herenegun gauean, abenduaren 31n, 22:25ean, sua piztu zen Getxoko Beato Domingo Iturrate kaleko etxebizitza batean. Larrialdi-zerbitzuek abisura joandako Ertzaintzako agente bi artatu behar izan zituzten kea arnasteagatik, eta horietako bat Urdulizko ospitalera eraman zuten. Suhiltzaileek sua itzali zuten eta ez zen zauritu gehiagorik izan.
Horrez gain, atzo goizaldeko 06:15ean beste sute bat izan zen Plentziako Isuskitza auzoan, etxebizitza bateko teilatuan. Bizilagunak etxe barruan zeudela piztu zen sutea, baina ez zen zauriturik izan. Suhiltzaileek goizeko 09:00ak inguruan itzali zituzten garrak.
Azkenik, urtarrilaren 1ean ere, hainbat edukiontzi erre zirela jakinarazi dute suhiltzaileek.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
