Joan den eguenean, otsailaren 13an, Torturaren Aurkako Eguna oroitu zuten, besteak beste, Algortan eta Plentzian. "Egia, aitortza eta erreparazioa" lelopean, jasandako indarkeria ikusarazi eta tratu txarrak eta torturak jasan dituztenei justizia eskatu zuten. Gogoratu zutenez, Getxon, 105 kasu daude ofizialki erregistratuta; Barrikan, 3 kasu; Gorlizen, 10; Lemoizen, 7; eta Plentzian, 18. Euskal Herri osoan, 5.657 tortura kasu egiaztatu ditu Euskal Memoria Fundazioak.
Algortan egindako ekimena Sortuk antolatu zuten; Plentziakoa, aldiz, Kandelaria Kultur Elkarteak. Azken horrek salatu duenez, 1975etik Plentzia, Gorliz eta Lemoizko 38 bizilagun torturatu dituzte Espainiako Polizia Nazionalak, Guardia Zibilak eta Ertzaintzak. Hala, biktima horiei hitza eman eta elkartasuna adierazteko, elkarretaratzea egin zuten hilaren 13an, Plentziako portuan, Guardia Zibilak torturapean hil zuen Jose Arregiren hilketaren 44. urteurrenean eta Torturaren Aurkako Egunean.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!