Antzemandako arazo nagusietako bat hondakin organikoen kudeaketa txarra dela nabarmendu dute Mankomunitateko iturriek, eta, batez beste, aztertutako zaborraren % 17,60 edukiontzi marroira bota behar ziren biohondakinez osatuta zegoen. Gainera, inausketetatik eta lorezaintza-lanetatik eratorritako landare-hondakin ugari ere aurkitu dituzte, guztizkoaren ia % 10. Mankomunitateak gogorarazi duenez, Berangon, Barrikan, Sopelan eta Urdulizen, esaterako, mota horretako hondakinak biltzeko zerbitzu berezi bat dago, gainerakoak edukiontzian pilatzea saihesteko.
Beste datu kezkagarri bat oraindik zabor arruntean amaitzen diren hondakin birziklagarrien kopurua da. Azaldu dutenez, beirazko ontzien (% 5,86) eta paper eta kartoizko ontzien (% 9,08) kopurua areagotu egin dute eta azken hiru urteetako baliorik altuenetara iritsi da. Ehun-hondakinen kopuru esanguratsua ere identifikatu dute, % 6ko batez bestekoagaz, eta horrek agerian utzi du erabilitako arropa eta berrerabil daitezkeen beste material batzuk hobeto kudeatu behar direla.
Laburbildu dutenez, emaitza horiek agerian uzten dute oso garrantzitsua dela hondakinak behar bezala bereiztearen inguruan herritarrak kontzientziatzen jarraitzea. Halaber, Mankomunitateak edukiontzi egokiak erabili behar direla azpimarratu du, eta herritarrei gogorarazi die hondakinak hobeto sailkatzeak ingurumenaren iraunkortasunari ez ezik, Hondakinen Legeak ezarritako helburuak betetzen ere laguntzen duela.