Euskaltzaindiaren Euskararen Erreferentzia Corpusean hartu du parte HIRUKAk

Erredakzioa 2025ko api. 2a, 10:15

EEC-ko aurkezpena. © EUSKALTZAINDIA

Euskararen Erreferentzia Corpusa (EEC) aurkeztu zuen martxoaren 31n Euskaltzaindiak. Horren xedea da "erreferentzia-corpusa" izatea, irekia eta kolektiboa, eta, bertan, azken 25 urteetako testuak jaso dira. 

Hizkuntza corpusa datu-bilduma handia da, liburutegi erraldoi baten parekoa, egitaratuta, erabilera errealetan oinarrituta eta linguistikoki prozesatua, hizkuntzaren atal baten erakusgarri legez erabiltzen dena. Proiektua duela 4 urte ipini zuten martxan, corpus handiagoa eta orekatuagoa izatea beharrezkotzat jo zutelako.

Euskaltzaindiak Euskal Herriko 68 erakunde pribatu eta publikogaz batera lan egin du hori sortzeko, horien artean, HIRUKA komunikabideagaz ere. 123.124 dokumentu bildu dituzte lehen bertsioan.

Testuak lematizatu eta sailkatu dira, lema, forma eta kategoria gramatikalen bidezko kontsultak egin ahal izateko. Urtero eguneratuko da, testuak gehitzeko, hutsuneak osatzeko eta ahalik eta erreferentzialtasunik handiena lortzeko. Liburuetatik datozen testu-hitzak 68,42 milioi dira (% 44,37), HIRUKA gisako aldizkako argitalpenetatik 72,49 milioi (% 47,01), sarerako berariaz idatzitakoak 4 milioi (% 2,59) eta bestelako edukiak (argitalpen bereziak, liburuxkak, gidoiak…) 9,3 milioi (% 6,03) testu-hitz.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun