Metro Bilbaok doitu egingo ditu trenen zirkulazioa apirilaren 25etik aurrera, maiztasunak mantenduta. Hala, azaldu duenez, murriztu egingo dira Bizkaiko Garraio Partzuergoak (BGP) Lutxana eta Erandio artean trenbidea erabat berritzeko egingo dituen lanen ondorioak, hala nola 90 segundoko atzerapenak. Aldaketa horiek urte amaierara arte egongo dira indarrean, Aste Nagusian izan ezik, garai horretan zirkulazioek ohiko ordutegia mantenduko baitute.
Iturriek azaldu dutenaren arabera, zerbitzuaren kalitateari eutsi gura diote eta, aldi berean, minimizatu datozen hilabeteetan obretako zatian sortuko liratekeen 90 segundoko atzerapenak.
Zehazki, egokitzapen egingo ditu Metro Bilbaok. Alde batetik, neguko lanegunetan (apirilaren 28tik ekainaren 30era eta irailaren 1etik urriaren 30era) puntako orduetan (07:35etik 10:16ra), Ibarbengoara doazen trenek Bidezabalen amaituko dute zerbitzua. Modu horretan, trenek buelta emateko geltokia aurreratuta, berreskuratu egingo dute obren zatian martxaren abiadura murriztu izanagatik galdutako denbora. Beste aldetik, gaueko zerbitzuetan (bariku eta zapatu gauetan) aldaketa txiki batzuk egingo dituzte: zehazki, Etxebarritik eta Kabiezesetik 3 minutu lehenago irtengo dira trenak, eta Basauritik, berriz, minutu bi geroago.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
