Euskal Herriko udaletxe askoren aurrealdeak jendez bete zituzten zapatu eguerdian, UEMAren deialdiari erantzunez. Espainiako Auzitegi Gorenak EAEko udal-legearen hainbat artikulu baliogabetu ostean, "euskararen aurkako beste oldarraldi baten" aurrean gaudela salatu zuten milaka herritarrek eta euskara elkarteek. UEMAko kide diren 118 udaletatik, hainbat kolore politiko ia 100ek parte hartu zuten deialdian, tartean, Erandio, Sopela eta lemoizek.
Ataungo plazan, Martin Aramendi UEMAko lehendakari eta herriko alkatea izan zen adierazpen nagusiak egin zituena: "Beste behin ere, euskara bigarren mailako hizkuntza bihurtu nahi dute, eta horren aurrean ezin dugu isilik geratu. Herritarrek gaur eman duten erantzuna eredugarria da".
Aramendik dei zuzena egin zien alderdi politikoei eta instituzioei: "Garaia da adostasun sendoetara heltzeko eta euskararen lege-babesa sendotzeko. Euskarak benetako justizia merezi du, eta horretan, udalek, herritarrek eta euskalgintzak elkarrekin egin behar dugu bidea".
Halaber, UEMAko ordezkariak iragarri zuen mobilizazioak ez direla gaurkoan amaitzen, eta iragarri zuen hurrengo asteetarako ekimen berriak prestatzen ari direla euskalgintzako eragileakaz batera, "eskubideak kolokan daudenean, kalean egotea ezinbestekoa delako".