Pasa den astean jakin zen Espainiako Auzitegi Gorenak baliogabetu egin dituela Eusko Jaurlaritzaren 179/2019 Dekretuaren artikulu esanguratsuak, VOXek aurkeztutako helegitearen bidez. Hori dela eta, gaur, uztailak 24, adierazpen bateratua irakurri dute Bilbon Euskalgintzaren Kontseiluko Idurre Eskisabelek eta hainbat alkatek eta udal hautetsik, besteak beste, euskara lehenesteko eskubidea urratzea eta autogobernua murriztea salatzeko. Bertaratutakoen artean Uribe Kostako udalerrietako ordezkariak ere izan dira
Salatu dutenez, "Epai honen ondorioz, udaletan ezingo da euskara lehenetsi, ezta gaztelerarekin batera erabiltzen denean ere. Finean, administrazioan euskararen erabilera normalizatu nahi bada neurri zehatzak hartu behar dira euskara gazteleraren parera iritsi dadin, hori du asmo indarrean dugun araudiak", adierazi dute agerraldian.
Gainera, nabarmendu dute epaiak ez duela kontuan hartzen euskal gizartearen eta erakundeen borondate demokratikoa, ezta azken Inkesta Soziolinguistikoak jasotzen duen euskararen aldeko babes zabala ere.
Eskisabelek adierazi duenez, "euskara larrialdi egoeran dago", eta azken urteotako epai uholdeak —30 inguru— ·euskal erakundeen hizkuntza-eskumenak higatzen" ari dira. Zentzu horretan, euskalgintzak eta erakundeek "jauzi bat" eman beharra aldarrikatu dute: "Segurtasun juridikoa indartu behar dugu eta beharrezko lege-aldaketarekin batera, euskal gizartearen jokaera proaktiboa sustatu behar dugu ahalik eta adostasun handiena eta zabalenarekin herritarren hizkuntza eskubideak bermatzeko eta euskararen erabilera normalizatzeko."
"Euskara behar dugu eta euskarak behar gaitu. Euskara baita gure hizkuntza, euskaldun egiten gaituena. Horregatik, euskalgintzak eta udal ordezkariok bat eginik, euskararen erabilerak dagokion lekua behar duela berresten dugu, eta horretarako beharrezkoak diren neurriak sustatzeko konpromisoa hartzen dugu gaurkoan", adierazi dute bukatzeko.