Eskualdeko mintzapraktika egitasmoek —Erandio, Leioa, Getxo, Barrika, Berango, Gorliz, Lemoiz, Plentzia, Sopela, Urduliz eta Laukizko berbalagunek— izena emateko bide bateratua jarri dute martxan. Horri esker, hemendik aurrera egitasmoan parte hartu gura duen orok taupamugimendua.eus/mintzapraktika webgunean sartu eta bere datuak utzita euskaraz aritzeko taldeetan parte hartzeko aukera izango du.
Egitasmoa doakoa da eta bere xede nagusia euskaraz lasai hitz egiteko arnasguneak sortzea eta harreman berriak sustatzea da. Azaroan abiatuko dira asteroko talde berriak, eta, horrez gain, hilean behin mendi-ibilaldi laburrak eta bizikleta-irteerak antolatzen dituzte eskualdeko kide guztientzat.
Antolatzaileek gogorarazi dute parte hartzeko baldintza bakarra euskaraz aritzeko gogoa izatea dela: "Euskaraz berba egiteko konpromisoa besterik ez da behar parte hartzeko".