Uribe Kostako Zerbitzu Mankomunitateak ingurumen-sentsibilizazio kanpaina berria jarri du martxan, herritarrak hondakinak sortzearen prebentzioaren garrantziaz hausnartzera eta ohitura jasangarriagoak hartzera gonbidatzeko. "Gris gutxiago, kolore gehiago" lelopean, kanpainak gogorarazi gura du birziklagarriak diren hondakinak edukiontzi koloredunetan utzi behar direla, grisean amaitu ordez.
Mankomunitatetik azpimarratu dutenez, "prebentzioa da jasangarritasunaren oinarria", eta eguneroko ekintza txikiek, hala nola kontsumoa murriztea, objektuak berrerabiltzea edo produktu iraunkorrak hautatzea, ingurumenaren babesean eta klima-aldaketaren aurkako borrokan laguntzen dute.
Kanpaina urriaren 27tik azaroaren 29ra garatuko dute, eta eskualdeko zazpi udalerrietan banatuko da. Hala, aste bakoitzean hondakin mota bati eskainiko diote: Aste Marroia, organikoaren eta konpostajearen inguruan; Aste Urdina, paperaren eta kartoiaren birziklapenari buruzkoa; Aste Horia, ontzi arinen eta plastikoen ingurumen-arazoei buruz; Aste Zuri Berdea, beira eta berrerabilpena ardatz; Aste Garbia, hondakinei buruzko lehiaketa dibertigarri batekin; eta Kolore Anitzeko Astea, amaierako jaia, hondartza-garbiketa eta ekonomia zirkularraren inguruko jokoakaz.
Kanpainan tailer praktikoak, hitzaldiak, jokoak eta familia-jarduerak eskainiko diuzte, guztiz doakoak eta parte-hartze librekoak. Mankomunitateak herritarrak gonbidatu ditu parte hartzera eta "eguneroko keinu txikien bidez, ingurumenaren aldeko kolorea ematera". Jarduera guztien egitaraua eta ordutegiak Mankomunitatearen kanal ofizialetan ere kontsulta daitezke.
Egitaraua:
