Aurreko barikuan, azaroaren 14an, Urdulizko Kultur etxean La invasión del plástico: el enemigo en casa dokumentala proiektatu zuten, honako estekan ikus daitekeena. Dokumental hau EITBko 360º programaren ekoizpena da, eta plastikoak gure inguruan duen eragina, naturan duen presentzia eta gure osasunean eta ekosistemetan izan ditzakeen ondorioak aztertzen ditu.
Saioa Uribe Kostako Zerbitzu Mankomunitatea egiten ari den, "Gris gutxiago, kolore gehiago" kanpainaren aurkezpenagaz batera egin zuten. Ekimen honek hondakinak prebenitzea eta birziklapen egokian sustatzea du helburu, errefusaren edukiontziaren erabilera ahalik eta gehien murriztearen garrantzia azpimarratuz, eta kontsumitzen ditugun materialak modu arduratsuan kudeatzera bultzatzeko.
"Gris gutxiago, kolore gehiago" kanpainak herritarren hondakinekin ikuspegia eta kudeaketa aldatzea du helburu, egunerokoan ohitura hobeak sustatuz, birziklagarriak diren materialei bizitza berria emanez eta eredu jasangarriago baterantz aurrera egiteko. Perspektiba hau ezin hobeto lotzen zen dokumentalaren mezuagaz, horretan ikerketak, testigantzak eta datu zientifikoak erabiltzen baitira plastikoek gure kostetan eta eremu naturaletan eragin sakona aztertzeko.
Proiekzioaren ondoren, eztabaida-saio bat ireki zen, eta plastikoen egungo egoeraren inguruan eta kontsumitzaile gisa egin ditzakegun ekintzen inguruan aritu ziren bertaratutakoak. Partekatutako gogoeten artean ingurumen-hezkuntza indartzeko beharra nabarmendu zen, erabilera bakarreko plastikoak murriztea, jatorrizko banaketa hobetzea eta ekonomiaren zirkularrari bultzada emango dioten politika ausartagoak eskatzea.
Plastiko bilketa Plentzian
Kanpainagaz jarraituta, azaroaren 29an Plentziako hondartzan plastiko-bilketa egingo dute. Ingurumenaren babesagaz eta kostaldean dagoen plastikoagaz kezkatuta dauden herritarrei dei egin diete ekintza horretan parte hartzera, eta horretarako hitzordua 10:00etatik 12:00etara jarri dute, Plentziako hondartzan bertan.