Antolatzaileen datuen arabera, Uribe Kostan 130 pertsona baino gehiago daude kale gorrian. Egoera honi aurre egiteko dauden baliabide instituzionalak oso mugatuak direla kritikatu dute. Eskualdeko aterpetxe publiko bakarrak 8 plaza besterik ez ditu eta tenperatura oso baxuak direnean soilik irekitzen dute.
Etxebizitza falta ez da pertsona hauek duten arazo bakarra, poliziaren jazarpena ere jasaten dutela salatu dute ekimenaren antolatzaileek. Salaketaren arabera, "agenteen intimidazioek eta mehatxuek etengabe birkokatzera behartzen dituzte".
Horrez gain, poliziak pertsona horien oinarrizko material urria apurtzen dituela salatu dute. "Presio eta jazarpen horrek gure herri eta auzoetan ugaritzen ari diren diskurtso arrazista eta xenofoboei bidea errazten die", ohartarazi dute taldeek. Azkenik, eskualdean dagoen baliabide falta eta pertsona hauek pairatzen duten utzikeria onartezinak direla berretsi dute.