Azken datu ofizialen arabera, Araban, Bizkaian eta Gipuzkoan egiten diren delituen %20 dira jada ziberdelituak. Gainera, fenomenoak hazkunde handia izan du azken urteetan: 2017an 9.000 kasu inguru erregistratzen ziren, eta gaur egun 28.000ra igo dira. EH Bilduren arabera, benetako kopurua handiagoa izan daiteke oraindik, delitu asko salatu gabe geratzen direlako.
Ortiz de Guineak egoera "gela erdian dagoen elefantea" dela esan du, segurtasunaren inguruko eztabaidetan askotan bigarren planoan geratzen dela salatuz. Izan ere, datuek erakusten duten arren ziberdelinkuentziaren pisua gero eta handiagoa dela, Ertzaintzaren unitate espezializatuan 26 agente baino ez daude lanean. "26 ertzain 28.000 delitu ikertzeko; bistakoa da ez direla nahiko", ohartarazi du.
Baliabide gehiago eta prestakuntza espezializatua
Legebiltzarrean adostutako neurriaren arabera, Jaurlaritzak Ertzaintzaren Enplegu Planaren barruan giza baliabideak handituko ditu, eta aldi berean baliabide teknikoak eguneratu eta modernizatuko ditu, zibersegurtasunaren ikuspegitik. Horrez gain, Arkautiko Akademiako prestakuntza planetan ziberdelituen inguruko edukiak indartuko dira, agenteek delitu mota horiei eta biktimei behar bezala erantzun ahal izateko.
EH Bilduko ordezkariak pozik baloratu du akordioa, eta ohartarazi du ziberdelinkuentzia "tsunami" bihurtzen ari dela. Haren hitzetan, segurtasuna "modu integralean" ulertu behar da gaur egungo gizarte gero eta digitalizatuagoan, eta horregatik zibersegurtasuna lehentasun estrategiko bihurtu behar dela defendatu du.