Hala ere, lau izan dira 2025eko urteko ebaluazioan ezarritako kalitate-irizpideak betetzen ez dutenak: Areeta (Getxo), Toña (Sukarrieta), Karraspio Txiki (itsasadarra, Mendexa) eta Portu Txiki (Zierbena). Horietan denboraldi osoan ez bainatzea gomendatu du Osasun Publikoaren Zuzendaritzak. Oraingoz, administrazio eta erakunde eskudunak lankidetzan ari dira ura aztertzen, arrazoiak identifikatzeko eta neurri zuzentzaileak aplikatzeko. "Eragina izan dezaketen faktoreen artean, azken udetan izandako prezipitazio handiak daude, unean-unean uraren kalitatea kaltetu dezaketenak", azpimarratu dute.
Gainera, jakinarazi duten moduan, Osasun Sailak etengabeko zaintza-programa bat egingo du denboraldi osoan. Horren bitartez, astean behin, bainatzeko gune guztietan laginak hartuko ditu uraren analisi mikrobiologikoa egiteko. "Horrez gain, hondartzen eta eremu kontinentalen inguruaren egoera orokorra ebaluatuko da, eta arreta berezia eskainiko zaie", ohartarazi dute. Helburua Eusko Jaurlaritzako Osasun Sailaren webgune ofizialean gune bakoitzeko egoera sanitariori buruzko informazio eguneratua eskuragarri izatea da. Azaldu dutenez, bertan, uraren kalitatea eta gorabeherak kontsultatu ahal izango dira modu arin eta gardenean.
Azkenik, nabarmendu dute bainatzeko uren zaintza 2023an sinatutako lankidetza-hitzarmenaren esparruan Uraren Euskal Agentziagaz (URA) hertsiki koordinatuta egiten dela, kostaldeko Udaleen, foru-aldundiaren eta hornidura- eta saneamendu-sistemez arduratutako erakundeen laguntzakaz.