Ekimenaren bidez, Mankomunitateak komiki bat zabaldu du herritarrak hausnartzera gonbidatzeko. Proposamena jolas moduan planteatu dute: tabakoa erretzearen eta bapeagailuak erabiltzearen arteko aldeak bilatzea, pertsonaiei, koloreei, gorputz-adierazpenei eta inguruneei erreparatuz. Helburua bi ohituren arteko aldeak ez direla beti diruditen bezain handiak erakustea da.
Mankomunitateak ohartarazi du bapeagailuen kontsumoa erretzea baino seguruagoa dela dioen pertzepzioa faltsua izan daitekeela. Izan ere, bi ohiturek osasunerako arriskuak dituzte: birikei eragin diezaiekete, mendekotasuna sortu dezakete eta epe luzera kalteak ekarri.
Kanpainak, gainera, produktu horien inguruan erabiltzen diren marketin-estrategiak ere jarri ditu jomugan. Zapore deigarriak, diseinu modernoak eta kolore biziak nerabeak eta gazteak erakartzeko erabiltzen direla salatu dute, kontsumoaren benetako arriskuak lausotuz.
Uribe Kostako Mankomunitateak gogorarazi du bapeagailuen erabilera ohiko tabakorako sarrera izan daitekeela, eta horregatik beharrezkotzat jo du gazteen artean informazioa eta pentsamendu kritikoa sustatzea. Informazio gehiago gura dutenek isdeco.prebentzioa@uribekosta.eus helbidera idatzi edo 94 676 26 74 telefonora deitu dezakete.