Laguntza horiek egoera ekonomiko zailean dauden pertsona eta familiei zuzenduta daude, ohiko edo ezohiko funtsezko gastuei aurre egin ahal izateko. Besteak beste, alokairua, hipoteka, hornidurak, elikadura, oinarrizko altzariak edo sistema publikoak estaltzen ez dituen osasun-tratamenduak ordaintzeko erabil daitezke.
Aurten, Mankomunitateak 525.445 euro kudeatuko ditu, Eusko Jaurlaritzak esleitutako zenbatekoaren bidez. Laguntza horiek ez dira aldizkako prestazioak; behar jakin batzuei erantzuteko dirulaguntzak dira.
Eskaerak bi modutan aurkeztu ahal izango dira: aurrez aurre, erroldatuta dagoen udalerriko Gizarte Zerbitzuen bulegoetan (Barrika, Berango, Gorliz, Lemoiz, Plentzia, Sopela edo Urduliz), edo telematikoki, Uribe Kostako Mankomunitatearen egoitza elektronikoaren bidez.
Lehen aldiz laguntza eskatu gura dutenek hitzordua hartu beharko dute aldez aurretik. Informazio gehiago jasotzeko, interesdunek 946 762 674 telefonora deitu, cita@uribekosta.eus helbidera idatzi edo Mankomunitatearen egoitzara jo dezakete, Sopelako Gatzarriñe kaleko 4. zenbakira, astelehenetik barikura, 09:00etatik 14:00etara.
Mankomunitateak gogorarazi du laguntza horien helburua gizarte-bazterkeriako egoerak prebenitzea eta herritar guztiek oinarrizko premiak asetzeko aukera izatea dela, bizi diren udalerria edozein dela ere.