Kontseiluak zabaldu duen mezutik ondorioztatzen denez, martxak hiru aldarri nagusi izango ditu: Euskal Herri osoan ofizialtasuna (Ipar Euskal Herrian koofizialtasuna, Nafarroan zonifikazioa gainditzea eta euskararen normalizaziorako oinarri juridiko sendoagoa), hizkuntza politiketan jauzi bat (euskararen ezagutza orokortzeko eta erabilera normalerako baldintzak sortzeko neurriak) eta euskaltzaletasuna bera indartzea, egunerokoan euskaldun gisa jokatzearen garrantzia azpimarratuta.
Egitarauari dagokionez, arrastian egingo dute mobilizazioa: 17:00etan hiru zutabe abiatuko dira Antoniuttitik, Runako Parketik eta Askatasun Enparantzatik, eta, ondoren, Gazteluko Plazan elkartuko dira; bertan egingo dute 18:00etan ekitaldi nagusia, amaiera berezi bategaz.
Uribe Kostatik joan-etorria egiteko autobusa ere antolatu dute, 20 eurotan. Irteerak honako hauek dira: 10:00etan Gorlizen (Itsasbide/Euskadiko Kutxa), 10:06an Plentzian (metro geltokia), 10:15ean Urdulizen (metro geltokia/batzokia), 10:30ean Algortan (Telletxe 2ko markesina) eta 10:40ean Leioan (Elexalde, Sakoneta, Piruli). Erandiotik 10:50ean irtetea aurreikusi dute, ordutegia zehazteko dagoela ohartarazita. Itzulera, berriz, 20:00etan izango da. Informazio gehiagorako, antolatzaileek harremanetarako helbide hau eman dute: bagaranorgetxo@gmail.com.