Proba barikuan, ekainaren 26an, hasiko da Leioan, 18:00etan. Txirrindulariak Elexaldetik abiatuko dira, eta 56,5 kilometroko zirkuitua osatu ondoren, helmuga ere Elexalden izango dute. Lehen etapa amaitzean maillotak banatzeko ekitaldia egingo dute bertan.
Bigarren etapa zapatuan izango da, ekainaren 27an, Berangon. Irteera 11:00etan egingo dute, eta parte-hartzaileek 63,3 kilometroko ibilbidea osatu beharko dute Simon Otxandategi inguruan kokatutako helmugara heldu aurretik. Aste-akabuko bigarren jardunaldiak sailkapen nagusia argitzen hasteko balioko du, azken eguneko etapa erabakigarriaren atarian.
Azken etapa domekan jokatuko da, ekainaren 28an, Erandion. Txirrindulariek 58 kilometroko ibilbideari aurre egingo diote, eta bertan erabakiko da aurtengo Txumaren irabazlea. Helmuga Txuma kalearen inguruan kokatuko dute, probaren sustatzailearen omenez.
Antolatzaileek nabarmendu dute Txumak hainbat formatu izan dituela urteotan, baina beti helburu berari eutsi diola: harrobiko txirrindularitzaren alde egitea eta etorkizuneko txirrindulariei lehiatzeko aukera eskaintzea.