Adierazi dutenez, hitzarmen "historikoa" sinatu dute osasun-sistemaren antolaketa-eredua aldatzeko bidean. Akordioak medikuen kolektiboari zuzendutako neurri espezifikoak jasotzen ditu, euren lanbide-jardunaren baldintzak hobetzeko eta osasun-sistema publikoaren iraunkortasunari erantzuteko.
Osakidetzak azaldu duenez, azken urteotan "zailtasun bereziak" egiaztatu dituzte langile medikoak eta fakultatibo espezialistak erakartzeko eta fidelizatzeko. Horregatik, planteatutako neurriek plantillen egonkortasuna, asistentzia-jarraitutasuna eta herritarrei ematen zaien arretaren kalitatea indartzea dute helburu.
Akordioak hainbat arlo jaso ditu: guardia medikoen erregimena eta horien librantza-sistema, produktibitate finkoko eta aldakorreko osagarriak, Lehen Mailako Arretako hobekuntzak eta aitorpen profesionalari lotutako neurriak, laguntza-helburuak betetzeagaz batera. Horrez gain, jarraipen-batzorde paritario bat eratuko dute, hiru hilean behin biltzeko eta neurriak zenbateraino betetzen diren aztertzeko.
Lore Bilbao Osakidetzako zuzendari nagusiak nabarmendu duenez, akordioa ez da "asmo-adierazpen soil bat", baizik eta konpromiso zehatzak, egutegiak eta jarraipen- zein kontrol-mekanismoak jasotzen ditu. Era berean, Osakidetzak azpimarratu du proposamenak ez dituela beste kolektibo batzuentzako hobekuntzak baztertzen edo mugatzen, eta gainerako profesionalen behar espezifikoak lantzeko negoziazio-espazioak zabalik daudela.