Elkartea Getxoko Portu Zaharrean elkartu zen pertsona guztiek edonora mugitzeko eta bizimodua bilatzeko duten eskubidea aldarrikatzeko; baita inguruko udalerrietan migratzaile eta errefuxiatu askok bizi duten egoera "krudela" salatzeko ere.
"Ezin gara isildu inguruko basoetan egoera txarretan bizi ari diren gazteak beren bizilekutik botatzen dituztenean; 'kalera' botatzen dira lo egiteko inolako alternatibarik eman gabe, ezta aterperik ere", adierazi zuen. Izan ere, nabarmendu zutenez, gazte horietako asko euskara eta gaztelania ikasten, lanerako trebatzen, paperak konpontzen eta euren bizimodua aurkitzen saiatzen ari dira, herriko kolektiboen eta auzokoen laguntzagaz. Horregatik, euren ustez, kalean egotea ez da "bitarteko faltaren ondorioa", baizik eta "borondate politikoa" falta dela. "Arrazakeriari aurre egin beharrean, beste alde batera begiratzea da", tamaldu zuten OEEko kideek.
Hori dela eta, kalean bizi direnak jazartzeari edo ezkutatzeari uztea eskatu zuten, baita horiek babestea, errespetatzea eta duintasunez tratatzea ere. "Harrera egitea ez da mesedea edo komenigarritasuna: eskubideen, gizatasunaren eta oinarrizko elkartasunaren kontua da", berretsi zuten.