Auzia aurtengo selektibitateko euskarako azterketaren inguruan sortutako polemikaren ostean iritsi zen epaitegietara. Ikasle batzuek bide judizialera jo zuten, eta kautelazko neurriak lortu zituzten euskarako kalifikazioa unibertsitatera sartzeko notan kontuan ez hartzeko. EHUk, ordea, erabaki horien aurkako errekurtsoak aurkeztu zituen, ikasle guztiei irizpide berberak aplikatu behar zitzaizkiela defendatuta.
Orain, auzitegiak arrazoia eman dio unibertsitateari. EHUren arabera, ebazpenaren ondorioz, prozedura judizialak abiatu eta kautelazko neurriak lortu zituzten ikasleen kasuan ere euskarako kalifikazioa kontuan hartu beharko da. Unibertsitateak gogorarazi du indarrean dagoen araudiak bi hizkuntza ofizialak ebaluatzea aurreikusten duela halako autonomia-erkidegoetan, eta euskarak gainerako ikasgaien baldintza berberak izan behar dituela.
Plaza gehigarri baten etorkizuna, zalantzan
Erabaki judizialak, gainera, ondorioak izan ditzake unibertsitateko plazen banaketan. Kautelazko neurriek beste ikasleei kalterik ez eragiteko, EHUk eta Eusko Jaurlaritzak plaza gehigarriak sortzea adostu zuten, beharrezkoa izanez gero. Azkenean, bi plaza gehiago aurreikusi zituzten, baina bakarra bete zen, beste ikasleak matrikulatzeari uko egin baitzion. Orain, betetako plaza gehigarri horren egoera zalantzan geratu da.
EHUk ontzat hartu du ebazpena, eta hasieratik defendatutako jarrera indartzen duela adierazi du. Era berean, azterketak zuzendu dituzten irakasleen lana aitortu du, eta selektibitateko prozesuak beharrezko berme guztiak izan dituela berretsi du, bai zuzenketetan, bai kalifikazioak berrikusteko eta erreklamazioak aurkezteko aukeretan. Unibertsitatearen esanetan, helburua ikasle guztiek baldintza berberetan lehiatzea da, salbuespenik eta pribilegiorik gabe.