Soinuak egitasmoa apirilean hasi zuten, flauta-emanaldi bategaz, eta urriaren 8an egin zuten aurtengo zazpigarren kontzertua. Antolatzaileek adierazi dutenez, orain arte, Getxoko Andres Isasi Musika Eskolak eta Erandioko eta Leioako musika-eskolek parte hartu dute. Hala, eskualdeko musika-eskoletako ikasleek euren doinuak ospitalera eramaten dituzte aldizka.
Egitasmoak paziente, senide eta osasun-langileen ongizate emozionala sustatu gura du, baita ospitalearen eta inguruko herrien arteko harremana sendotzea ere. Horretarako, musika-eskoletako ikasleei komunitatean parte hartzeko aukera ematen die. Maider Quintana Uribeko Erakunde Sanitario Integratuaren humanizazio-batzordeko kidearen arabera, pazienteen eta laguntzaileen erantzuna positiboa izan da; eta horrek erakusten du, zaurgarritasun-uneetan, kulturak eta arteak eragin berezia izan dezaketela.