Ekimenaren helburua, alde batetik, administrazioagaz euskaraz egiteko aukera bermatzea; eta, beste aldetik, ahal den neurrian, euskara ohiko hizkuntza gisa erabiltzea sustatzea da. Horretarako, Mankomunitateak herritarrei lehen hitza euskaraz egiteko eta solaskideak horretarako aukera ematen duenean elkarrizketa euskaraz mantentzeko deia egin die.
Kanpaina Barrikan, Gorlizen, Lemoizen, Plentzian, Sopelan eta Urdulizen jarriko dute martxan. Mankomunitatearen ustez, euskararen normalizazioan herritarren erabilera ezinbestekoa da, eta administrazioak euskaraz aritzeko aukera eskaintzeaz gain, herritarrek aukera hori erabiltzea sustatu gura dute. Gainera, Euskara Zerbitzuak kanpainagaz euskararen erabilera sustatzeko eta euskaraz egiteko aukerak zabaltzeko duen konpromisoa berretsi du.
Azkenik, nabarmendu dutenez, kartelen diseinua eta inprimaketa berezia izan da. Izan ere, Diseinu Grafikoko bi ikaslek sortu dituzte kartelak, eta risografia-teknikaren bidez banan-banan inprimatu dituzte; beraz, kartel bakoitza bakarra da.