Subflubiala Ez! plataformak dioenez, azken astea "gogorra" izan da ekologistarentzat. Euriak bere arropa eta ohea busti ditu, baina, auzokideen eta plataformaren laguntzagaz, arropa lehortzea eta zuhaitzeko babeslekua hobetzea lortu du, bertan jarraitzeko aukera izateko. Izan ere, argi utzi du: proiektua bertan behera utzi arte, ez da jaitsiko.
Plataformako kideek ere aldarrikapenari eusten diote. Urteak daramatzate proiektua salatzen, eta oraindino proiektua bertan behera uzteko arrazoi ugari dituztela gogorarazi dute. Alde batetik, kutsaduraren eta larrialdi klimatikoaren arazoak nabarmendu dituzte, euren arabera, azpiegiturak egunero 11.000 auto gehiago eragingo lituzkeelako errepideetan.
Bestalde, proiektuak Artatza parkea suntsituko lukeela salatu dute. Euren esanetan, Leioa eta Getxo arteko azken birika berdea da, eta muturreko tenperaturen aurrean aisialdirako gunea eta babesleku klimatiko naturala da. Horrez gain, Ballonti ibaiaren ingurua eta arrain arantzadunaren habitata ere suntsituko lituzkeela gogoratu dute.
Plataformakoek bereziki nabarmendu dute obrek Artaza-Romo institutuan eta inguruko ikastetxeetan izango luketen eragina: euren ustez, etengabeko leherketak, zarata gorgarria, bibrazioak eta esekidura-hautsa erabat bateraezinak dira ikasleen eta irakasleen osasunagaz eta ongizateagaz. Gainera, Aldundiak obrek irauten duten bitartean Kalitate Akustikoko Helburuak bertan behera uztea erabaki duela salatu dute.
Horren aurrean, berriz ere, plataformak ibaipekoaren proiekturako aurreikusitako 500 milioi euroak garraio publikoa indartzera bideratzeko eskatu du.