Kanpainak zazpi esparrutan jarriko du arreta: harreman pertsonaletan, ingurune hurbilean, espazio digitalean, kalean, etxean, ikasgeletan eta lantokietan, baita erabiltzen ditugun diskurtso eta irudietan ere. Izan ere, Mankomunitateak indarkeria matxista ez dela beti modu agerikoan azaltzen azpimarratu du, eta horri eusten dioten estereotipoak zein jarrera normalizatuak ere zalantzan jarri behar direla.

Bereziki gazteengana iritsi gura dute, berdintasunean, errespetuan, autonomian eta adostasunean oinarritutako harremanak sustatzeko. Horretarako, hausnarketa hutsetik harago joan eta kultura zein sorkuntza artistikoa baliatuko dituzte herritarrak inplikatzeko.
Bost hitzordu
Egitaraua azaroaren 20an hasiko da, Gorlizen, Warmipura: Eraldaketa eta sendatze migratzailea dokumentalaren emanaldia eta ondorengo solasaldiagaz. Emakume migratzaileen bizipenak izango dira ardatz, 18:00etan, Udaleko Bilkura Aretoan.
Azaroaren 24an, ordea, indarkeria digitalari erreparatuko diote Berangon. Autodefentsa digitala jarrera atzerakoiaren gorakadaren aurrean: Trad Wives, Gym Bros eta manosfera izeneko hitzaldia egingo dute Berangoeta Kultur Etxean, 18:00etan. Sare sozialetan zabaltzen diren diskurtso atzerakoiak eta horiei aurre egiteko moduak izango dituzte hizpide.
Azaroaren 25ean, Emakumeen aurkako Indarkeria Matxista Ezabatzeko Nazioarteko Egunean, Mankomunitatearen manifestua irakurriko dute eta elkarretaratzea egingo dute Sopelan, erakundearen egoitzaren aurrean, 12:00etan.
Bi egun geroago, azaroaren 27an, Sucia filma proiektatuko dute Sopelako Kurtzio Kultur Etxean, 18:00etan. Egitaraua abenduaren 10ean amaituko da, Urdulizko Inola Elkartean, Haizea Malabaricia eta Amaia Santamariaren Rabia y Ternura kontzertu poetikoagaz, 17:30ean.
Jarduera guztiak doakoak izango dira, baina aldez aurretik izena eman beharko da. Horretarako, izen-emate inprimakia beteta bidali behar da berdintasuna@uribekosta.eus helbidera, edo WhatsApp bidez jarri harremanetan 652 773 780 zenbakian.