Koronabirusa Uribe Kostan

Elorduy zahar-egoitzako kutsatu-kopurua 41ekoa da daborduko, horietatik zortzi behargin

Argazkia: HODEI TORRES

Joan den aste-akabuan ezagutu zen Barrikako Elorduy zahar-egoitzan koronabirus-agerraldia egon zela: 33 positiboren berri eman zuten orduan, baina kopurua 41era igo da honezkero, hasiera batean negatibo eman zuten pertsona batzuen proben behin betiko emaitza jakin ostean. Kutsatuetako zortzi bertako langileak dira, eta daborduko ordezkoak kontratatzen hasi dira, eguneroko jardunari eutsi ahal izateko.

Fernando Ibarra Elorduy Fundazioko kudeatzaileak azaldu duenez, azkenean egoitzako zortzi langilek eman dute positibo (astelehenean beharginei egindako hainbat probaren emaitzen zain zeuden). Ez dute sintomarik baina etxean daude berrogeialdia betetzen; horregatik, egoitzako arduradunek ordezko langileak kontratatzeari ekin diote. Bost lanean hasi dira daborduko, eta beste batzuk zain daude.

"Hain zuzen ere, hastekoak diren ordezko langile horien PCR proben emaitzaren zain gaude", dio Ibarrak. Kontratatutako jendea Zorrozaurreko erietxe batera bidaltzen dituzte testak egitera, momentuz Elorduy egoitzak berak ordainduta, nahiz eta etorkizunean diru hori Osakidetzari erreklamatzeko asmoa duten.   

Egoera "egonkorra" dela dio Fernando Ibarrak, eta positibo gehienek ez dutela sintomarik. COVIDa zuen gaixoetako hil da egunotan, baina ez gaixotasun horren ondorioz, egoitzako arduradun nagusiaren esanetan. El País egunkariari emandako elkarrizketa batean, Ibarrak azaldu du langile jakin batzuek baino ez dutela harremana positibo eman duten egoiliarrakaz. Azken horiek solairu berera eroan dituzte, eta ezin dira beste solairuetara joan; kutsatu gabeak, aldiz, ez dira solairu horretara sartzen. Bateko eta besteko langileak ez dira elkarregaz egoten egoitzaren barruan, solairu bakoitzak bere sarbidea baitu, eta aldagelak ere desberdinak dituzte. Aparkalekuan baino ez dute bat egiten beharginek, eta bata bestearengandik behar bezain beste urrunduta.

Erlazionatuak

Ia erabiltzaileen erdiek positibo eman ondoren, hainbat langileren proben emaitzen zain daude Elorduy egoitzan

Barrika

Barikutik zapaturako gauean jakin zen beste patologia batzuengatik ospitaleratuta zeuden Barrikako Elorduy zahar-egoitzako hiru erabiltzailek posit...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun