Joan den barikuan, hilaren 22an, Barrikan aurkitutako gorpuzkiek tiro bi dituzte, ETBk jakinarazi duenez. Polizia zientifikoa jazoera ikertzen ari da oraindino, hildakoa nor den argitu ahal izateko. Iturrien arabera, baliteke 35 eta 40 urte arteko gizona izatea, duela 15 bat urte hil zutena.
Eusko Jaurlaritzako Segurtasun Sailak jakinarazi duenez, joan den barikuan, 15:30ak aldera, larrialdi zerbitzuek dei bat jaso zuten, Barrikako mendi-inguru batean gorpuzki batzuk agertu zirela jakinaraziz. Segituan, polizien hainbat patruila bertaratu eta gizaki batenak zirela egiaztatu ondoren, epaitegiari abisua eman zioten.
Hasiera batean, lehenengo ikustaldian, adituek ez zituzten indarkeria-zantzurik aurkitu hilotzean. Orain, aldiz, auzitegi-medikuek eta forentseek egindako ikerketen arabera, gorpuzkiek tiro bi dituzte.
Ertzaintzak adierazi duenez, ikerketak aurrera jarraituko du jazoeraren nondik-norakoak argitu arte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
