Azken urte bietan, zein dira lortu dituzun lorpen garrantzitsuenak? Zeintzuk dira, zure ustez, Barrikako Udalak lortutako aurrerapen handienak?
Hiri Antolamenduko Plan Orokorra (HAPO) behin betiko onartzea, Barrikaren etorkizuna eraikitzeko tresna. Barrikan HAPO berri bat izatea lortu dugu, eta horrek herriaren etorkizun urbanistikoa zehazten lagunduko digu datozen urteetan. Etorkizunean, behin betiko onespen horrekin, 425 etxebizitza inguru eraiki ahal izango dira, eta kopuru horretatik garrantzitsuena da 130 etxebizitza inguru babes publikokoak izango direla.
Aurrerapauso bat udalerrian egiten den ekintza bakoitza da, txikia izan arren. Garrantzitsua da bizilagunei entzutea, eguneroko eskaerei eta beharrei erantzutea, eta barrikoztarren bizi-kalitatea hobetzen saiatzea. Gutxi argiztatutako leku batean farola bat jartzea edo existitzen ez zen eremu batean banku berri bat jartzea, haur-parke bat konpontzea pertsonen bizi-kalitatea hobetzen duten ekintza txikiak dira.
Aurrerapen bat Goierri auzoa berrurbanizatzea izan da. Berroneratze-obra bat izan da, oinezkoei garrantzi handiagoa emateko eta auzoko hiri-ingurunean ibilgailuen zirkulazio-abiadura murrizteko.
Zeintzuk dira oraindino burutu gabeko proiektu nagusiak? Zeintzuk zailtasun izan dituzue horiek gauzatzeko?
Legealdi honetan aztertu dugun alderdietako bat auzoen arteko irisgarritasuna eta lotura hobetzea da. Hurrengo egunetan, Zabaletxe auzotik Goierriraino espaloia eraikitzeko obraren lizitazioa aterako da, 3114 foru bidearen paraleloan. Oinezkoentzako eta bizikletentzako espaloia da, eta aipatutako bi auzoen arteko lotura konpontzea du helburu, segurtasuna hobetuta. Gaur egun, bi auzo horiek foru bide baten bidez komunikatuta daude. Bide horrek bazterbideak baino ez ditu, eta pertsonak bertatik igaro behar dira, horrek dakarren segurtasun arriskuarekin, bai eta oinarrizko zerbitzuetara iristeko zailtasunarekin ere, hala nola Goierriko autobus geltokira.
Lizitatuta dagoen eta uztailaren erdialdera hasiko den beste proiektu bat Mendietako bidea hobetzeko obrak dira, hau da, Goierriko Ander Deuna eta Sopela arteko galtzada konpontzea, seinaleztatzea eta trafikoa lasaitzea, oinezkoei eta bizikletei lehentasuna emateko bide horretan zirkulatzen duten ibilgailuen aurrean. Horrela, 2024an Goierri auzoa berrantolatzeko egindako obrarekin jarraitu nahi da.
Eta datorren urterako hasi gara Goierri eta Elexalde lotuko dituen oinezkoentzako eta bizikletentzako espaloiaren proiektua prestatzen, foru bidearen paraleloan.
Ekimen hauek aurrera eraman ahal izateko aurkitu ditugun zailtasunak administratiboak izan dira gehienbat.
Herritarren parte-hartzea sustatzeko, zer neurri hartu ditu Udalak? Sentitzen al duzu herritarrak entzunak sentitzen direla?
Gu herritarren esanetara gaude beti, haien eskaerei eta beharrei erantzuteko. Egin ditugun edo laster gauzatuko ditugun proiektu guztiak bizilagunek helarazi dizkiguten beharrek eragin dituzte.
Gainera, aurten jarri dugu martxan 2026rako partaidetzazko aurrekontuen lehen prozesua. Horrela, herritarrak udal-aurrekontuaren zati bati buruzko erabakiak hartzen aktiboki parte hartuko dute, Barrika hobetzeko beharrezkotzat jotzen dituzten proiektuak formulatuz.
Hiri-mugikortasuna da herritarren kezka nagusietako bat. Zein neurri hartu dira garraio publikoa hobetzeko eta autoaren erabilera murrizteko?
Garraio publikoari dagokionez, aldundiarekin bilerak egin dira udalerriko garraio publikoaren maiztasuna hobetzeko eta ospitaleekin eta zerbitzu publikoekin lotura berriak sortzeko.
Eta udalerriko auzoen arteko interkonexioa sustatzeko?
Autoaren erabilera murrizteko eta hiriko mugikortasuna hobetzeko, lehen aipatu dudan bezala, herriko txoko bakoitzaren arteko lotura errealitate bihurtzea jarri dugu ardatz.
Etxebizitzaren prezio altua da udalerrian bizi gura duten gazte askoren oztopo nagusia. Zein da Udalaren estrategia gazteei etxebizitza eskuratzeko laguntzeko?
Etxebizitzaren prezio altua oztopo nagusia da herrian bizi nahi duten gazte askorentzat. Gaur egun, Barrikan eraiki den etxebizitza mota ez dago gazteen esku. Oso ilusionatuta gaude HAPO onartu berri delako, ia 30 urte bete ondoren, garapen jasangarria egin nahi dugu, etxebizitza publikoa bultzatuz eta gure gazteek Barrikan bizi ahal izan dezaten bultzatuz, kolektibo ahulenei ere etxebizitza bat eskuratzen lagunduz.
Kulturaren eta kirolaren sustapenari dagokionez, zer proiektu nabarmenduko zenituzke?
Kultura eta kirolak gure herrian daukaten garrantzia beti saiatzen gara nabarmentzen, elkarte eta eragile desberdinen artean zubiak eraikiz eta uneoro lankidetzan. Elkarkidetza sustatuz, gure herrirako onurak argi daude, gure kultura mantenduz, ezaugarri propioak ahaztu gabe eta gizarte duin, berdintasunezko eta euskalduna bultzatuz. Eremu horren barne dauden ekimen guztiak sustatzen ditugu, etengabeko bilakaera batean.
Agintaldiaren bigarren erdirako, zeintzuk dira zure helburu nagusiak? Nola gura zenuke udalerria ikustea zure kargua amaitzen denean?
Gure helburu nagusia da 2027rako barrikoztar guztientzako bizi-kalitatea eta aukerak dituen herri kohesionatu, batu bat lortzea eta hori burututa ikusi nahi nuke.