Horrez gainera, Bizkaiko Foru Aldundiak martxoan eta apirilean baso-suteen prebentziorako jarduerak egiteko laguntza-deialdi bat egitea aurreikusi duela iragarri du Unzuetak.
Laguntzen hartzaileak baso-ugazaba pribatuak, baso-jabeen elkarteak eta udalak izango dira; helburua hainbat jarduera-mota egitea izango da, berbarako: baso-suteen defentsa eta prebentziorako azpiegiturak jartzea, ur-hornidurarako puntuak jartzea, biltegiak eraikitzea, suaren kontrako elementuak sortu, mantendu eta gehiago jartzea eta basoko pisten sarea sortu eta mantentzea.
Laguntza horiek baso arlorako pakete zabalago baten barruan daude eta laguntzen azken zenbatekoa deialdian ezarritako epean aurkeztu eta onetsitako eskabideen araberakoa izango da, hala azaldu baitu Elena Unzuetak.
Era berean, Unzuetak azpimarratu du nolako garrantzia duten suteen prebentziorako jarduerek eta adierazi du aurten eta datorren urtean gauzatu ahal izango direla onesten diren proiektuak. Haren esanetan, prebentzioa indartzea da Aldundiaren asmoa. Izan ere, Iraunkortasuna eta Ingurumen sailburuak adierazi duenez, prebentzioan inbertituta garatzen diren politikek "aldea markatzen dute eta modurik onena dira suteen aurkako borrokan".
