Joan den maiatzaren 1ean Berangoko XXIII. Nekazaritza eta Artisau Azoka izan zen. Antolatzaileek jakinarazi dutenez, eguraldi ona, giro bikaina eta salmenta "handiak" izan ziren azokan, "eta zenbait saltoki ordu bietarako itxi behar izan ziren, salgai barik gelditu zirelako". Euskal Herriko Euskal Pastelaren Lehiaketaren harira, beste urte batez gailendu zen Leire Belaustegi gasteiztarra.
Langabezian geratu ostean, bere lantegi artisaua jarri zuen martxan Izarran (Araba) Leire Belaustegik. Hori 2012an izan zen, eta ordutik hona daborduko euskal pastelaren inguruko Euskal Herriko hiru txapelketa irabazi ditu: 2012an, 2015ean eta 2016an.
Jakinarazi dutenez, "hori ez da kasualitatea", Belaustegiren Goiuri Gozogintza euskal pastelean espezializatuta baitago. Txapeldunaren berbetan, errezetan Gorbeiako esnea eta arrautzak, azukrea, "maitasun handia eta eguneroko esfortzua" nahasten dira.
Ohiko pastelaz gain, txokolate, gerezi eta masusta gorrikoak ere egiten ditu Belaustegik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
