Politika  Berango 2018-06-27 13:47

Beste hamabost urteko espetxe-zigorra Saioa Sanchez presoarentzat

Espainiako Auzitegi Nazionalak hamabost urteko kartzela-zigorra ipini dio Saioa Sanchez Iturregi preso politiko berangoztarrari. Apirilean estraditatu zuten Sanchez Frantziatik Espainiara, eta ekainaren 6an epaitu zuten Madrilen.

Beste hamabost urteko espetxe-zigorra Saioa Sanchez presoarentzat
Saioa Sanchez Barajasko (Madril) aireportuan. © ESPAINIAKO BARNE MINISTERIOA | Ikusi handiago | Argazki originala

Auzitegi Nazionalak fiskalaren zigor-eskaria onartu du, eta honenbestez, hamabost urteko kartzelaldia gehitu dizkie bai Berangoko presoari bai haregaz batera epaitutako Beatriz Etxeberria eta Iñigo Zapirain presoei, Bilboko INEMeko bulego batean lehergailu bat ipintzeagatik. Sanchez 28 urteko zigorra betetzen dabil Frantzian, eta hara bueltatu beharko da Espainian epaitua izan ostean.

Amnistiaren Aldeko eta Errepresioaren Aurkako Mugimenduak salatu du "epaileek torturaren praktikaren zigorgabetasuna eta zuriketa bermatzeko beste urrats bat" eman dutela. Kontuan eduki beharra dago Sanchez, Etxeberria eta Zapirainen aurka egindako lehenengo epaiketa baliogabetu egin zuela Espainiako Auzitegi Gorenak, akusatuek salatutako torturak ikertu ez zirelako. Joan den ekainaren 6koa errepikapena izan zen, hortaz. Lehenengo epaiketan ere, 2016an, hamabost urteko zigorra egotzi zieten hiru akusatuei.

Epaian, Auzitegi Nazionalak dio ez dagoela zantzurik Sanchezek, Etxeberriak edo Zapirainek euren borondatearen kontra deklaratu zutenik pentsatzeko.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa