Udal-aurrekontuei 203 ekarpen egin dizkiete Berangoko herritarrek

"2020ko aurrekontu partehartzaileak" prozesuaren emaitzak zabaldu ditu Berangoko Udalak. Denera, 138 berangoztarrek egindako 203 ekarpen jaso dira.

Ekarpen gehien jaso duen arloa (130, %64) Hirigintza, Ingurumen, Obra eta Zerbitzuena izan da, Udalak jakinarazi duenez. Beste 42 Kultura, Kirola eta Berdintasunari dagozkio, eta 31 beste arlo batzuei. Udalak ez du momentuz zehaztu zeintzuk izan diren ekarpenak. Parte hartu duten 138 pertsonetatik, 82 emakumezkoak izan dira eta 56 gizonezkoak. Hizkuntzari dagokionez, berriz, ekarpenen %12 baino ez dira egin euskaraz.

Udalak gogorarazi duenez, Berangon erroldatutako 16 urteko pertsona denek izan dute parte hartzeko aukera, aurtengo irailaren 15etik 29ra bitartean, horretarako ipini diren bideak erabilita. Hain zuzen ere, 56 ekarpen jaso ziren irailaren 24 eta 25ean horretarako ipinitako karpan, 38 udal-webgunearen bidez ailegatu dira, 27 posta elektronikoz, 12 herriko hainbat lekutan ipinitako postontzietan jaso dira, eta beste 5 Nagusien Etxean.  

"Teknika edota ekonomiaren aldetik bideragarriak diren proposamenak" eta "Iraunkortasun ekonomikoa eta finantzarioa justifikatuta dituztenak" egiteko aukera eman du parte-hartzezko prozesuak, Udalak dioenez. Beti ere, udal-eskumenen barrukoak izan behar dute proposamenek.

Erlazionatuak

Aurrekontuak osatzeko parte-hartzezko prozesua abiatuko du Berangoko Udalak

Berango

Berriro ere, 2020ko aurrekontuak osatzeko parte-hartzez prozesua ipiniko du martxan Berangoko Udalak. Hala, berangoztarrek proposamenak aurkeztu ah...