Udalaren esparrutik zelan aurre egin klima-aldaketari?

Berangoko Udalak antolatuta, kafe-tailerra egingo dute eguenean, abenduak 12, Berangoeta Kultur Etxeko liburutegian, klima-aldaketaz jarduteko. Iraileko osoko bilkuran onartu zen gaiaren inguruko parte-hartzezko prozesuaren lehenengo pausoetakoa izango da. Hitzordua 18:30rako ipini dute.

"Egoera oso kezkagarria da ingurumenari eta klima-aldaketari dagokienez, eta Berangok ezin dio erronka horri muzin egin", adierazi du Udalak bere Facebook orriaren bitartez. Zehazki, klima-aldaketaren alorreko estrategiak udal-mailara ekartzen hasteko helburua izango du egueneko saio bikoitzak. Lehenik eta behin, arazoaren gainekoa azalpen orokorrak emango dituzte adituek, eta Udalak eremu horretan zer egin duen jakinaraziko da. Sektoreko profesionalek hondakinez, mugikortasunaz eta efizientzia energetikoaz berba egingo dute.

Bigarrenik, taldeka aztertuko da bai Udalak berak bai herritarrek zer erantzukizun hartu behar duten, "klima-aldaketaren aurkako borrokan elkarregaz jarduteko eta denon ekarpenakaz Berango jasangarriagoa lortzeko helburuz kontzientziazioa sortzeko".   

Udalak gogorazi duenez, Berangoko osoko bilkurak berretsi egin du Klima Larrialdiari buruzko Aldarrikapen Instituzionala, uztailean Eusko Jaurlaritzak hartutako bide beretik. 

Erlazionatuak

Kale-argiak berrituko dituzte hainbat auzotan

Berango

Berangoko Udalak 239 kale-argi aldatuko ditu egunotan Kurtze, Gatzarriñe, Intxaurraga eta Santa Ana auzoetan, "efizientzia energetikoa hobet...