Berangoko herritar bat epaitegira deitu izana salatu du Amnistiaren Aldeko Mugimenduak

Amnistiaren alde Berangon egindako ekitaldi baten artxiboko irudia.

Abenduaren 3an eta 9an Getxoko epaitegira deklaratzera deitu dute Berangoko herritar bat (kasu bakoitzean auzi ezberdin batengatik), eta hori salatzeko kartelak ipini ditu Amnistiaren Aldeko Mugimenduak. "Berangoko herritar honen aurkako prozesu judizialak etetea exijitzen dugu", adierazi dute.

Esan dutenez, lehenengo zitazioak zerikusia du "Patxi Ruiz euskal preso politikoa gose greban zegoela haren alde egindako ekimenekin". Bigarrena, berriz, uztailaren 25ean egindako manifestazio baten propagandagaz lotuta dago. Gaineratu dutenez, auzibideen dokumentazioak adierazten du Ertzaintzak eta Berango eta Sopelako udaltzainek jarraipen poliziala egin diotela herritar horri.

"Denen militantzia eta denen egoerak estatuen biolentzia estrukturalen ondorio izanik", jarraitu dute, "amnistia osoaren aldarrikapenak ez du ametitzen aurrera eramandako borroka moldearen araberako diskriminaziorik. Errepresio mailaren, salaketa indibidualen eta garaien arteko ezberdintasunak alde batera utzita, amnistia osoaren aldeko elkartasun sarea sortzeko deia egiten dugu".

Getxoko epaitegiaren aurreko elkarretaratze bana egitera deitu dute abenduaren 3an, 10:30ean, eta abenduaren 9an, 11:15ean.  

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun