Emakume Langileen Nazioarteko Eguna 2021

Historiako emakume esanguratsuak gogoan izango dituzte egunotan Berangon

© BERANGOKO UDALA

Historiako emakume esanguratsuen argazkiez bete dute Berango udalerria egunotan, martxoaren 8a dela eta. Arduradunek azaldu dutenez, helburua da herritarrak irudiok bilatzea, horiek dituzten mezuak irakurri eta gehien inspiratzen duten emakumeagaz argazki bat egitea.

Udal-arduradunek azaldu dutenez, aurtengo martxoaren 8rako, "emakume ausart, paregabe eta aitzindariz" bete dute Berango. "Emakume horiek ez zuten beldurrik izan, sinesten zutenaren alde borrokatzeko, beren ametsak betetzeko".

Argazkiak udalerrian sakabanatuta jartzeaz gainera, Udalak desafioa egin die herritarrei: "Emakume horiek aurkitu eta zuretzat dituzten mezuak ikus itzazu, eta gonbidatzen zaitugu gehien inspiratzen zaituen emakumearekin argazki bat egitera, eta guri bidaltzera, WhatsApp bidez, Ludotekara, 688 63 08 30 telefonoaren bidez". Ondoren, batutako argazki guztiak Berango Berdintasunak martxoaren 8rako prestatu duen Facebookeko orrira igoko dituzte.

Erronka martxoaren 14ra arte egongo da indarrean, eta, parte hartzaileen artean, hurrengo egunean, Neskato Errebeldeentzako Neska Onen ipuinak liburuaren ale batzuk zozketatuko dituzte.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun