Berangoko udal-eraikinaren atarian Ukrainako gerrari lotutako Errusiaren aldeko pintadak egin dituzte gaur gauean. Anabel Landa alkateak ekintza hori kondenatu du, eta deitoratu du ez daukala "inolako zentsurik" eta "errespetu falta bat dela denona den eraikin publikoa horrela hondatzea". Azaldu duenez, gaia hurrengo astean egingo duten Udaleko osoko bilkurara eramango dute.
Alkateak gaineratu duenez, "bere egunean Bozeramaileen Batzordera eraman genuen Ukrainako gerrari buruzko adierazpena, baina ez zen aho batez onartu, PP abstenitu baitzen eta EH Bilduk aurka bozkatu baitzuen".
Aurreko asteetan, Lemoizen eta beste hainbat udalerritan azaldu diren pintada berdinak izan dira gaur Berangon egin dituztenak; zehazki, udaletxeko atarian Ukraina eta Errusiaren arteko gudari erreferentzia egiten dioten "Z" eta ikur komunistak margotu dituzte.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
