Lantegiko 25 behargin kaleratu zituen iaz Berangoko Alconza enpresak, tailerreko 21 langile, eta bulegoko beste lau. Despeditze horiek gauzatu aurretik, bost hilabeteko greba burutu zuten, eta borroka horren ondorioz, lau langilek deklaratu beharko dute Getxoko epaitegietan.
LAB sindikatuak gogoratu du grebak iraun zuen bitartean errepresioak ez zuela etenik izan, "isun ekonomikoak jaso genituen Mozal Legea aplikatuz, eta Ertzaintzak hainbat langile jipoitu eta zauritu zituen". Horrez gainera, sindikatuak deitoratu du, gainera, Alconzak, "Irizarren oniritziarekin", beharginen aurkako prozesu judizialei eustea erabaki du eta, horren aurrean, LABek auzi horiek bertan behera uztea exijitu du. "Langileen eskubideak, gure eskubideak eta lanpostuak defendatzea ez da sekula delitua izango".
Horregatik guztiagatik, sindikatu horrek paroak deitu ditu azaroaren 8rako, 11:00-12:30erako eta 13:45-14:45erako, eta elkarretaratzea 11:15ean Getxoko epaitegiaren atarian, Alcontzako lankideari babesa emateko, prozesu judizial guztiak bertan behera uzteko eskatzeko eta borroka sindikala delitua ez dela aldarrikatzeko.
