Otxandategi dorretxea husteko Ertzaintzak egindako operazioa salatzeko eta aurrera begira hirigintza proiektu "basatien" kontra borrokatzen jarraitzeko deia egiteko elkarretaratzea egin zuten atzo, eguenean, dozenaka lagunek Berangon. Horretan, poliziek erabilitako "indarkeria" salatzeaz gainera, jasotako elkartasuna nabarmendu zuten: "Erresistentzian elkarrekin egon ginen bezala, ostean datorrenari ere elkarrekin egingo diogu aurre".
Ildo horretan, dorretxea eta haren lurrak okupatu zituztenetik "ikasitakoak" nabarmendu zituzten, "espazioak, berau defendatzeko emateaz gainera, beste mugimendu batzuekin saretzeko aukera ere eman digu, elkar elikatzekoa". Horri esker, gainera, inguruko hirigintza "eredu suntsitzaile honen salaketak oihartzun handiagoa" sortu ahal izan duela nabarmendu zuten.
Era berean, eta aurrera begira jarrita, Otxandategitik kanporatu dituzten arren, borroka ez dela amaitu iragarri zuten: "Aitzitik, orain da gogorren borrokatu beharreko unea". Azaldu zutenez, lursaila behin hustuta dagoela, "denbora kontua besterik ez da" enpresa-eraikitzaile batek hori erostea eta bertan eraikitzen hastea. Hori dela eta, estrategia berriak marrazteko beharra azpimarratu zuten, "bai Otxantegiren markoan, bai Uribe Kostan".
Horren aurretik, eta kaleratzean jasoko dituzten isunei begira, Getxoko sanisidroetan egongo direla iragarri zuten, barikuan eta zapatuan, iluntzean, haiek ekoitzitako irinaz taloak egiten, baita hilaren 25ean ere, Leioako Kurkudiko azokan ere.
