Berangoko Santa Ana eta Santo Domingo jaiak Udalak antolatu ohi ditu. Hala ere, hainbat ahaleginen ostean, duela urte bi herritar talde batek jai-batzorde herrikoia osatu zuen, eta 2023an Udalak prestatutako ekintzakaz batera hainbat jarduera programatu zituzten, hala nola azoka, herri kirolen erakustaldia, umeentzako tailerrak, igel-toka txapelketa edo irrintzi lehiaketa.
Herritar talde horrek azaldu duenez, orain arte, "Udalaren politika azpikontratatzea eta elkarte zein pertsona jakin batzuei baino ez zabaltzea izan da jaiak antolatzeko bidea". Hori dela eta, bestelako jai herrikoi eta parte-hartzaileak prestatzeko asmoa iragarri zuten, eta Udalaren programako hutsuneak beraien jarduerakaz bete zituzten; Udalaren ekintzetatik kanpo, baina elkar zapaldu gabe.
Iaz inolako trabarik gabe ekintzak aurrera atera ahal izan zituztela ikusita, aurtengo jaiak baldintza berdinetan prestatzeari ekin zioten. Azaldu dutenez, "herritarren eta Udalaren arteko elkarlana bultzatzeko", Berangoko Udalarengana ere jo zuten, "baina hainbat oztopo medio eta udalarekin izandako komunikazio faltak bertan behera uztera behartu gaitu".
Era berean, Udalak jakinarazpen ofizial bat helarazi zien adierazteko ezinezkoa zela egitaraua gauzatzea nahitaezko baimenik gabe, "baina inolako alternatibarik eman barik". Horregaz batera, Udalak publiko egin zuen idatzi bat herritarrak ohartaraziz "egitarau ofizial bat baino ez dagoela", eta dei egiten "baimenik ez duten jarduera horietan parte har ez dezaten".
Hala ere, azkenik, Udalak eta jai-batzorde herrikoiak bilera izan zuten aurreko astean, eta iragarri zuten hurrengo urteko jaiei begira, "denon artean talde-lana sustatzeko borondatea" adostu dutela, "beste jai-formatu bat lortze aldera".
Udalaren jakinarazpena
Berangoko Udalak jai-batzorde herrikoiari bidalitako jakinarazpena eskuratu ahal izan du HIRUKAk. Horren arabera, jaien egitaraua Kultura Zinegotzigoaren bitartez garatzeaz gain, segurtasun- eta higiene-arrazoiak direla-eta, ezartzen du jabari publikoan egiten den edozein jarduerak Udalaren nahitaezko baimena behar duela.
Zehazten du, jai-batzorde herrikoiak hainbat jarduera antolatu gura zituela udalaren nahitaezko baimenik gabe, "eta are larriagoa dena, ondorioz, segurtasun-, edukiera-, osasungarritasun- eta higiene-baldintza teknikoak betetzen direnik bermatu gabe". Gainera, Udalaren jakinarazpenak azaltzen du elkarte antolatzailea ez dagoela irabazi-asmorik gabeko elkarte gisa inskribatuta Eusko Jaurlaritza Elkarteen Erregistroan, ezta Udalean ere, "beraz, ez du nortasun juridikorik".
Bukatzeko, Udalak ondorengo ohartarazpena igortzen die jai-batzordeko kideei: "Beren jarrera eteten ez bada eta beren programan deskribatutako jarduerak ezkutuan eta Udalaren nahitaezko baimenik gabe egiten badira, Berangoko Udalak dagozkion zehapen-neurriak hartu beharko dituela, bai eta beharrezkoak diren kautelazko neurriak ere".
