Koalizioko kideen esanetan, Berangoko gobernu-taldeak eraikina zaharberritzeko lizentzia eman zuen aurrez Bizkaiko Foru Aldundiaren txostena jasota. Txosten horretan, Aldundiak nabarmendu zuen "edozein esku-hartzek" helburu argi bat izan behar zuela: "Eraikinaren balio kultural eta ondarezkoak kontserbatu, berrerabili eta agerian jartzea". Udal lizentziak, gainera, "baserriaren zaharberritzea" baimentzen zuen, eta, EH Bilduren arabera, XIX. mendeko eranskin batzuk botatzeko aukera jasotzen zuen arren, "errota bera eta XVI. mendeko beste eranskin bat mantendu behar zirela" azpimarratzen zuen.
Hala ere, koalizioko ordezkariak bertaratu eta "baserria, eta, beraz, errota ere, eraitsita" dagoela egiaztatu dute. Horregatik, EH Bilduk azalpenak eskatu dizkio Udalari: "Lizentzia zaharberritzeko eman bazen, nola azaldu daiteke eraisketa?". Koalizioak gaineratu du otsailaren 6an obren espedientea ikusteko eskatu zutela eta obren egoerari buruzko informazio eguneratua eskatu ziotela udalari, baina oraindik ez dutela erantzunik jaso.
Salaketaren harira, EH Bilduk ohartarazi du ondare-eraikin batean egindako esku-hartzeek "berme, jarraipen eta gardentasun" handiagoa behar dutela, eta Berangoko Udalari eskatu dio espedientearen dokumentazioa eskuragarri jartzeko eta obren gaineko informazioa argitzeko.
