Isunak Lantzarteko aparkalekuaren obren testuinguruan gertatutako protestagatik ezarri dituzte. Egun hartan, makineria zuhaitzak erauzten hasi zenean, hainbat auzokide hurbildu ziren obra-eremura, egoeraren aurrean haserrea eta ezinegona adierazteko.
Lantzarte Bizirikek azpimarratu du gertatutakoa ez zela aurrez prestatutako ekintza bat izan, unean bertan sortutako erreakzio "espontaneoa eta baketsua" baizik.
Elkartearen arabera, hogei bat lagunek jaso dituzte isunak, adin askotako auzokideek. Administrazioak egotzitakoaren arabera, protestak obrak geldiarazi zituen, eta horregatik ezarri dizkiete zehapenak. Plataformak, ordea, herriko berdeguneak defendatzeagatik zigortzea "onartezina" dela salatu du.
Kolektiboak galdera hau plazaratu du: "Natura defendatzeagatik, suntsitzen duenak ezarria?". Horregatik, herritarrak mobilizazioan parte hartzera animatu dituzte, isunak salatzeko eta Lantzarteko berdeguneen aldeko aldarria berriro kalera ateratzeko.
