Koronabirusa Uribe Kostan

"Prest gaude gure testak erabil ditzaten"

CC BY SA-EUSKAMPUS FUNDAZIOA

Berria egunkarian Maite Asensio kazetariak elkarrizketa egin dio Nekane Balluerka EHUko errektoreari. Besteak beste, EHUk koronabirusa atzemateko garatu duen proba metodoaz galdetu dio, polemika sortu baita gaiaren inguruan, Osakidetzak ez duelako erabili EHUren lana. Bide batez, akatsa argitu nahi izan du: egunean ia mila proba egin ditzakete EHUn garatutako metodoa erabiliz, eta ez, zabaldu den bezala, 10.000.

Kazetariak pasa den astean Eusko Jaurlaritzako Osasun Sailarekin egindako akordioa zertarako den galdetu dio. Balluerkak azaldu du nola PCR probak egiteko metodologia lortu zuten, kit komertzialen beharrik gabe. Kit komertzialen arazoa da azkar agortzen diren material batzuk behar dituela. Balluerkak gaineratu du balidazio klinikoa behar zela eta oraindik ez dela lortu: “Oraindik hobetzen ari gara metodoa, probak zehatzagoak izan daitezen”. Akordioaren arabera, Espainiako Osasun Ministerioaren ikerketan EHUko testak ere egingo dira.

Ministerioaren ikerketatik kanpo metodoa erabiliko den galdetuta, ondokoa erantzun du Balluerkak: “Osasun arduradunek uste badute beharrezkoa dela milaka proba horiek egitea, guk geure burua eskaini dugu behar duten guztirako; prest gaude gure testak erabil ditzaten”.

EHUk berak adierazi zuen duela aste batzuk metodoa Madrilgo Karlos III.a Institutuak balioztatu zuela, baina orain Balluerkak dio balidazio klinikoa behar duela. Kazetariak horretaz galdetu dio eta errektoreak erantzun du Osakidetzaren metodologia eta EHUrena parekatu behar direla orain, eta ikerlariak horretan ari direla.

Ikerlariak bere eremuan sartu direlako Osakidetzan nolabaiteko errezeloren bat egon daitekeen galdetu dio kazetariak eta ez lukeela hala izan behar dio Balluerkak. Osakidetzaren zerbitzura jarri direla eta haien irizpideak beteko dituztela gehitu du.

Argia aldizkaritik hartu dugu artikulu hau, Creative Commons-en CC BY SA lizentzia baliatuta. Ikusi hemen jatorrizko artikulua.

Erlazionatuak

"Euskadik koronabirusa detektatzeko duen gaitasuna handitzeko" hitzarmena Osasun Sailaren eta EHUren artean

EHU

Nekane Murga Eusko Jaurlaritzako Osasun sailburuak eta Nekane Balluerka EHUko errektoreak lankidetza-hitzarmen bat izenpetu dute gaur, "Euskadin SA...
EHUko milatik gora irakaslek egin dute bat PCR testen gaineko adierazpenagaz

EHU

Joan den apirilaren 25ean EHUko 30 irakasle inguruk kaleratutako adierazpenagaz bat egin dute daborduko unibertsitateko 1.000tik gora ikerlari eta ...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun