Adierazi zutenez, sektoreko enpresek atzo, urriak 6, Leioako EHUko campusean egin zuten jardunaldiaren helburua zen "boluntarioak erabiliz etekinak lortzea, hau da, eskulana dohainik". Deitoratu zuten ez dela harritzekoa, beraien lan-baldintza zein prekarioak diren kontutan hartuta.
LAB sindikatuko bozeramaileek azaldu zuten ziur daudela Bizkaian 3.000 langile inguru dituen sektoreko lan-baldintzen hobetzea hitzarmen sektorial baten eskutik etorriko dela: "Horregatik, LABek aniztasun funtzionalaren eremuko lehen hitzarmen kolektibo sektorialaren aldeko apustua egin du".
Halaber, salatu zuten Gaude, FEKOOR, APNABI, Madres Mercedarias Gorabide eta sektoreko hainbat enpresa eta elkarte ez direla ari euren hitzarmenak negoziatzen, eta, horiekaz batera, udalak eta Bizkaiko Foru Aldundia egoera horren erantzule direla. Horrenbestez enpresei eta erakundeei hitzarmena negoziatzeko dei egin zieten atzoko protestan.
Hori guztia kontutan izanda, "aldarrikapen eta mobilizazio marko bat eskaintzeko apustua egiten jarraituko dugu", iragarri zuen LAB sindikatuak, gaineratuz beraiena dena besterik ez direla ari eskatzen. Halaber, goraipatu zuten sektore horretako ordezkaritza sindikala gero eta indartsuagoa dela, elkartuago daudela eta "kolektiboarentzat historikoa" izango litzatekeen hitzarmen probintzial baten alde kaleetan presioa egiten jarraituko dutela.
