Erandioko Udalak udalerriko pertsona nagusien protagonismoa eta parte-hartzea sustatzen dabil. Horretarako, pasa den maiatzean, adinekoen ekimenak bultzatzeko lehiaketa ipini zuen martxan. Bertan, erronka egin zien 60 urtetik gorakoei, interes komuneko proiektuen lidergoa hartzeko, ekimen berriak proposatuz edo daborduko daudenetan jarduera berriak proposatuz. Proiektuak barikuan, azaroak 11, aurkeztuko dituzte Altzagako azoka zaharrean, 18:30ean. Bertan, sariak banatuko dituzte; festa osatzeko, dantza-talde batek eta Mendibaiarte abesbatzak erakustaldia egingo dute. Azkenik, dantzaldia izango da Galea orkestragaz. Sarrera doakoa eta irekia izango da.
Sari nagusia proiektua bideratzeko 700 euroko laguntza izango da, Erandioko Udalak gogorarazi duenez. Era berean, beste bi sari izango dira, bakoitza 150 eurokoa. Denera, zazpi proiektu aurkeztu dituzte, denak daborduko martxan direnak. Ukitutako arloak honakoak dira: musikari lotutako sustapena eta parte-hartzea, margoa eta maketa-tailerrak, xendazaletasuna-ibilbideak mugitzeko zailtasunak dituztenentzat egokitutakoak, euskarazko jarduerak hizkuntza praktikatu eta erosoago murgiltzeko, elkartasuna eta artea Internetez lotzea, eta hiri-hondartza baten sorrera proposatzeko azterlana.
Barikuan argituko du epaimahaiak zeintzuk diren irabazleak. Ekimen hori Erandioko Udalak eta Gaurko Nagusia Fundazioak antolatu dute, "pertsona nagusien zahartze aktiboa sustatzeko, euren ekarpenak publikoki eskertuz". Daborduko, bost urte daroatzate bi erakundeak elkarlanean.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
