Modu berean, udal-bilkurak aholkatu zion Unai Rementeriaren foru-kabineteari auzia Espainiako Estatuko epaitegietan ere zabal dezan, “egingarria ikusten duenean”. Onartutako testua EAJk proposatu zuen eta talde gehienen babesa izan zuen, PP izan baitzen bakarra ezezko botoa ematen, 1977ko Amnistiaren Legearen aurkakoa dela iritzita.
Erandioko Udala akusazioa izatea, alboratuta
Dena den, testu jeltzaleak ez zuen oposizioa gogobete. Hala, Ganemos Erandio udal-taldeak aldeko botoa eman arren, kritikatu zuen Udalak bere ardura Aldundiaren bizkarrean ipintzea.
EH Bilduk, bestalde, gogorarazi zuen 80 urteko isiltasun instituzionalaren ondoren heldu dela pasa den egueneko akordioa. Ezkerreko koalizioak planteamendu zuzenagoa eroan zuen Udalbatzara: Erandioko Udala bera Argentinako auzitegietan pertsonatzea. Bide hori sustatu izan du Frankismoaren Krimenen Aurkako Kereilaren Euskal Plataformak zenbait udalerritan; daborduko, Gernika-Lumo, Iruñea edo Durangoko udalek iragarri dute auzian pertsonatuko direla. Halere, EH Bilduk adostasun falta ikusi zuen ekarritako mozioa onartzeko eta bertan behera utzi zuen.
