Batetik, Goi-Alde 1965eko abuztuaren 15ean agertu zen lehen aldiz jendaurrean, Andra Mari jaietan. Jose Luis Intxaurbek (Kotxelu) sortuta, gaur egun taldeak 150 kide (dantzari eta musikari) baino gehiago dauzka. Euskal Herri osoko dantzak erakutsi guran, 52 urtetan errepertorio zabala bildu eta metatu dute. Goi-Alde taldearen agerraldiak, nagusiki, Bizkaiko lurraldean izaten diren arren, hemendik kanpo ere hainbat lekutan ibili izan dira. Esaterako: Hungaria, Turkia, Austria, Herrialde Katalanak, Andaluzia, Gaztela, Asturias, Aragoi, eta Euskal Herriko zenbait plaza, urtero-urtero Bilboko Aste Nagusian eta herriko jaietan parte hartzen dutela ahaztu barik.
Bestetik, Colimako unibertsitateko ballet folklorikoa 1980an sortu zuen Rafael Zamarripa Castañeda koreografo eta eskultoreak. Lehenengo aurkezpen ofiziala 1983ko uztailaren 23an egin zuen; ordutik, eta 30 urtez segidan, bira asko egin ditu bai Mexikon bai nazioartean; besteak beste, herrialde hauetan aritu dira: Estatu Batuak, Kanada, Puerto Rico, Panama, Kuba, Portugal, Guatemala, Espainia, Belgika, Suitza, Ingalaterra, Frantzia, Alemania, Txina, Korea, Ekuador, Italia eta Herbehereak. Mexikoren ordezkari ofiziala izan da mundu mailako ekitaldietan. Urte hauetan sari garrantzitsuak eskuratu ditu; horietako batzuk, nazioartekoak.