Altzaga auzoko metro-irteeran ipini dute hitzordua, arratsaldeko 20:00etan. Nazkatuta gaude, bat ere ez gehiago! goiburupean, zapatutik domekarako gauean Akarlanda parkean egindako sexu-erasoa gaitzetsiko dute.
Erasoaren ustezko egilea handik ordu gutxira atxilotu zuen Ertzaintzak, eta espetxera bidali du epaileak daborduko. Biktimak salatu duenaren arabera, gauaren une batean Akarlandan aparkatutako autora abiatu zen lo egitera. Esnatu zenean, egin zioten sexu-erasoaz ohartu zen. Lagun batek esan dionez, gizonezko bat ibilgailuan sartu zen eta, geroago, ihes egin zuen, korrika.